【英國買車】英國第一部車點買？想入手二手平車「錢七」有甚麼方法？

首先原來英國嘅易手車普遍比香港貴（雖然新車比香港平），尤其係落地五年以上嘅歐洲車，例如香港要搵架落地十年嘅MINI應該三五萬港紙不是太難，但英國你要預六至八千鎊至搵到部似樣少少。響香港我一向鍾意揸大車，最好係七人車，貨VAN都唔介意，因為香港養車成本貴，既然牌費燕梳油費車位都差無幾，養架大車坐多幾個人一定著數啲，不過呢度係冇乜MPV嘅選擇。其實都有見過有人放我好鐘意嘅豐田ESTIMA，但因為係進口車，考慮到維修零件等問題，都係揀唔落手。

必須承認我其實係要求多多，首先想搵歐洲車，因為响香港用慣日本車，難得過到嚟梗係想試新嘢試本土嘢；要自動波，太太唔識棍波；要電油車，怕有機會入ULEZ要俾附加費；最少要五個位，方便將來可以接載吓親戚朋友，去SHOPPING買多少少嘢都得；又要低咪，要八萬咪以下；當然更重要係低BUDGET，目標五至八千鎊之間，因為叫做呢邊第一部車，泊街，粗用，唔想有咩損傷肉痛。於是篩吓篩吓，選擇已經剩返好少（仲未講太太偏好揭背小車，唔鐘意某啲樣某啲顏色等等）。

响AUTOTRADER篩完一輪，其實嚟嚟去去都係得啲GOLF、POLO、ASTRA、FOCUS、FIESTA、308、CLIO呢幾個款揀。一直以為英國好多車款選擇，原來唔係，一般居民嚟嚟去去都係開呢幾款車。偶然睇中一架特別少少嘅，間車行可能距離你幾十英里，搭車過去睇吓都要兩三個鐘。即係話，响你買車之前，最好已經有一部車。

另外有啲車款明明我哋都有啲興趣（雖然實際未必會買），但永遠唔會喺個SEARCH LIST度出現，例如A1、A3、CLUBMAN、GOLF PLUS、TOURAN、SHARAN、CADDY、MITO、PUNTO、500X，我估有可能因為OUT BUDGET，但更大機會係呢啲款根本冇乜自動波款或者汽油偈，又或者真係冇乜本地人揸。

又係我衰我腌尖，响剩番嘅選擇中，我又對法國車冇乜好感，對意大利車有啲避忌，因為覺得法國人同意大利人造時裝、造手袋，同煮嘢食都好叻，造車就唔係好信得過。所以基本上都係偏私德國車（其實劈頭話想買德國車咪得囉，做咩講咁多廢話啫）。咁啲德國車之中呢，又唔知點解啲GOLF同POLO都好貴，一架落咗地十年行五萬咪嘅POLO都仲可以叫價八千鎊，GOLF再貴少少（就算係FOCUS或者FIESTA之類都唔平，似樣啲都要四、五千鎊。呢個車價响香港可以買二手BBA啦。雖然唔知點解係要同香港比⋯⋯）。

所以最後，為咗滿足自己嘅虛榮心，就買咗部低價低咪（四萬幾咪，四千幾鎊）嘅A150。

揸落，啲確係好實在，細車嚟講係好舒服，感覺好實淨、好安全（初到貴境最重要係呢點），用料好足，同啲福士、福特係兩回事，同啲日本車仔更加冇得比；車廂空間好夠，坐响入面唔覺得係坐緊揭背車；加上我買嘅係ELEGANT版本，又有合金鈴，又有大天窗，又有桃木TRIMMING、HARMAN/KARDON音響、前後泊車SENSOR。新車ELEGANT同CLASSIC嘅車價差距較大，買家可能唔捨得用幾萬蚊UPGRADE，但二手車差少少就冇理由會揀番CLASSIC，因為CLASSIC的確有少少齋，唔好話天窗，後座連電窗都冇。

揸落，啲確係好實在，細車嚟講係好舒服，感覺好實淨、好安全（初到貴境最重要係呢點），用料好足，同啲福士、福特係兩回事，同啲日本車仔更加冇得比；車廂空間好夠，坐响入面唔覺得係坐緊揭背車；加上我買嘅係ELEGANT版本，又有合金鈴，又有大天窗，又有桃木TRIMMING、HARMAN/KARDON音響、前後泊車SENSOR。新車ELEGANT同CLASSIC嘅車價差距較大，買家可能唔捨得用幾萬蚊UPGRADE，但二手車差少少就冇理由會揀番CLASSIC，因為CLASSIC的確有少少齋，唔好話天窗，後座連電窗都冇。

我架車比市價平，因為係細DEALER（有機會再講呢點），車身CONDITION一般，花痕都明顯嘅，駕駛席個人造皮墊更加係修補過。咁都好，唔使咁錫車。而我揸咗只係一星期就响自己車房門口俾人撞爆咗門邊鏡指揮燈，HIT AND RUN，都冇咁肉痛。

講嚟講去，其實都係為咗JUSTIFY當初自己買呢部車嘅抉擇。

好喇，揸咗一年後終於換車。結論係點呢？冇後悔！因為呢架車既RUNNING COST好低，實用性好高，而且一年內完全冇任何事故或故障出現過(推翻咗好多師兄話W169系A-CLASS好多問題既講法)，更重要係佢成功幫到我哋(特別係太太)熟習英國本地既駕駛環境，同埋慳咗唔少錢！