英國青年失業情況有幾嚴重？逐步拆解社會及經濟危機

根據最新官方統計，2025年英國總失業率升到4.7%，雖然响歷史上仍然處於低水平，但其中16-24歲年齡層嘅失業率就好誇張，高達14.1-14.6%，逼近2020年疫情初期水平。根據Youth Employment數據，現時大約有94.6萬16至24歲年青人，屬於NEET狀態（唔係讀緊書、唔係返緊工、唔係做緊培訓），不過當中只有約36.5萬人真係搵唔到工(unemployed)，其餘58.3萬人被定義為「經濟不活躍」(economically inactive)，即係多數時間宅响屋企，冇積極咁出去搵工。

我哋試過响職場上撞到好幾位真實嘅本地年輕人，佢哋好多都係本地大學畢業，一直都搵唔到理想嘅工作，最後要同我哋呢啲新移民半退休大叔大嬸一齊做啲最低工資嘅抄散兼職。問佢哋點解唔正正經經去搵份長工，佢哋就話搵咗好耐都搵唔到，其中一個年輕人仲要係响倫敦某大學經濟系畢業，真係令人匪夷所思。

對於呢個現象，我哋嘅解釋係，英國同好多已發展地區例如香港一樣，受高等教育嘅人口比例較高，但係受到經濟發展所限，巿場未能提供足夠嘅相關職位。反而某啲需要特定就業技能嘅工作，例如看護、汽車維修、物業維護，雖然有唔少職位空缺，但係又無辦法請到呢班高學歷嘅年輕人。於是就出現咗就業錯配，變成「有工冇人做，有人冇工做」。由於高學歷職位集中响英國東南部，所以北部嘅高學歷青年就更加難搵到在地嘅合適工作。

年青失業唔單只令佢哋冇咗收入咁簡單，仲衍生一連串心理問題。報告指出，愈來愈多年輕人因為情緒病諸如焦慮、抑鬱，而唔願意主動參與職場競爭。舊年有超過27萬16-24歲年輕人因為長期病假或精神障礙（比2014年倍增）而失業或者唔想搵工。社會於是出現咗一個「雙失青年」群體：佢哋冇工返，冇書讀，社交圈疏離，心理狀況瀕臨崩潰。

根據我哋親身觀察，情緒問題响年輕人圈子的確係幾嚴重。我哋响職場上時不時都會遇到一啲後生仔，失驚無神會因為焦慮、抑鬱，甚至失戀(係，呢個真係一個理由)而唔返工，因而對僱主同其他同事帶嚟好大麻煩。久而久之，令僱主更加唔想請後生嘅僱員，而傾向請年紀比較大、責任感比較重嘅同事。惡性循環，令到年輕人搵工更加困難。我哋覺得呢個似乎並非本土問題，而係全世界嘅普遍現象。

另一焦點就係移民結構急速變動，而家好多行業，特別係行政、餐飲、護理、建築，以至零售，本地僱主都傾向用新移民取代本地年輕人。原因係新移民學歷較高，肯接受較低人工，同彈性工作時間。加上脫歐後英國企業需應付額外成本壓力，僱用新移民變成「速食」嘅生存策略。

年輕人高失業率所帶嚟嘅問題，唔單只令政府減少咗稅收。青年失業一旦維持超過一年，將嚴重拖低一生收入、職業晉升機會，仲可能成為長期貧窮戶。政府亦要支出大量失業救濟，加劇公共財政負擔。高比例失業青年亦會加劇社會分化、貧富差距、精神健康危機。當企業人口老化、退休年齡提升，更多新血失業，最終阻礙生產力提升同經濟轉型。

至於解決方案，最新嘅報告建議，政府應該補貼僱主招聘，同時培訓雙失青年，推動未來勞動力抵免。報告建議僱主可以提前得到一半工資資助，半年後獲得餘下資助，務求鼓勵僱主多聘請同培養本地年輕員工。不論政黨、業界專家，現階段都認同失業已經唔係單靠市場調節可以解決，並且期望政府早日落實針對性政策，切實幫助呢一班「被遺忘嘅下一代」。

總括而言，英國年輕人失業問題不單只係一場數字危機，更加係結構性、跨代、跨行業嘅勞動市場重整。如果你即將畢業準備投身職場，應該盡快思考下一步如何裝備自己，同埋如何確定自己嘅人生路向。