英國名牌大學竟有四成為中國內地學生！英國邊間大學最多內地生？

最近有幾個香港朋友都正準備安排仔女响英國升讀大學，其中一個家庭冇申請到BNO Visa，父母預咗繼續留港搵錢，為仔女俾海外生學費；另一個家庭就係太空人狀態，雖然一家三口都有BNO Visa，但阿爸一直响香港返工，只有阿媽陪仔女响英國讀書；而另外一個家庭已經全家人嚟咗英國三年，如無意外希望趕得切响大仔入大學之前攞到永居，可以慳返一筆海外生學費。

呢幾個香港人朋友都不約而同要為將來揀邊間大學讀而頭痕，基於來自父母嘅優良血統，佢哋仔女嘅考試成績預計唔會構成太大嘅障礙，而學費方面父母都已經早有準備，主要考慮嘅只係大學嘅校風、學術水平、仔女嘅興趣，同埋學科嘅出路等等。

不過，葉師傅同導遊珍最近就啱啱响網上睇到一份報告，覺得內容都幾具參考價值，有可能會影响呢幾個年輕人嘅選擇，所以認為必須同呢幾個家長，甚至其他網上讀者分享吓。

話說有個網民又係正準備為仔女報考英國大學，於是佢利用英國HESA (Higher Education Statistics Agency)响2022至2023年最近發表嘅兩份公開數據，好有心機咁做咗一份Excel表出嚟，比較英國咁多間大學之中，中國內地學生同香港學生所佔嘅數目同埋比例。

响呢份表格列出嘅255間英國大學之中，發現中國內地學生佔整體學生最高比例嘅10間大學分別係：
 

睇咗以上資料之後，我哋同埋呢幾個家長朋友都真係嚇咗一跳，估唔到响疫情之後，仍然仲有咁多中國內地學生响英國讀緊大學，而且當中唔少都屬於香港家長夢寐以求嘅名牌大學。其中我哋都識唔少香港人响度畢業嘅UCL(University College London)，單論在校中國留學數目更加係冠絕全英，達到接近1.4萬人。

而就算係以上排响10名以外嘅一啲知名學府，包括The University of Bristol、University of Durham、The University of Glasgow，裡面就讀嘅中國留學生比例都仍然佔非本地學生比例接近一半，即係話學校入面每兩個非本地生，就有一個來自中國內地。

有機會同咁多嚟自中國內地嘅尖子一齊學習當然都不失為好事，又可以趁機會練好啲普通話，話唔定仲有機會識到啲富二代、官二代嘅同窗添，但係呢個係咪我哋啲香港家長朋友想要嘅嘢呢？咁就要再問吓佢地先知喇。