【千頌C專欄】科網AI大戰！微軟押重注ChatGPT 為何Google咁慌張？
- 27 Feb 2023
每隔一兩年，就會有新嘅科技名詞成為金融界炒作主題，對上一浪係係NFT、元宇宙。至於今年，肯定係由OpenAI開發嘅ChatGPT。ChatGPT簡單來講就係AI Chatbot，你問佢問題，佢可以用人類嘅語言答你問題，甚至吟詩作對寫故仔。
老實講，試過就知出到嚟效果係驚人嘅，上幾星期我Facebook 只係輕輕一post ChatGPT寫情信實測，已經有人留言「人類就嚟收皮，我都唔知應該開心定唔開心」香港網民討論都尚且熱烈，更何況係國際股票市場？
ChatGPT概念大熱
微軟（MSFT）作為ChatGPT大股東，年初至今短短個半月，最多累積升超過15％，市值重上2萬億美元大關，取代沙特阿美，成為全球第二大市值公司，僅次於Apple。至於Nvidia（NVDA）就受「ChatGPT用上1萬粒Nvidia出產嘅高階GPU」消息推動，股價狂炒高，年初至今飆六成。
「Google，你俾微軟追打呀！」
港股代表呢，就有公佈3月推出「文心一言」AI Chatbot嘅百度（9888），YTD升兩成；最新中資電訊股都被歸隊為概念股，中移動（941）、中電信（728）都分別表示研究ChatGPT應用，結果中移動上星期創四年高，728更加創近八年高。
講咁多科技股，都冇提過Google嘅？事實係今次Google，好聽啲就係俾微軟殺一個措手不及，更白啲講法就係：「Google，你俾微軟追打呀！」
微軟於2019年向OpenAI投資10億美金，2021年再投20億美金，去到上月初，再加碼投資100億美金。你可以質疑佢係咪值，但無可否認嘅係，ChatGPT的確開咗個靚頭！
OpenAI上年11月底先推出ChatGPT，2個月就成功吸1億用戶，破咗TikTok 9個月1億戶嘅歷史紀錄。然後好快地，微軟就公佈會將技術整合喺Microsoft Teams Premium，又推出應用ChatGPT技術嘅新版Bing，挑戰Google search engine霸主地位。
Bard竟然答錯問題
Google都唔係省油嘅燈，拿拿臨搞個發佈會，推出AI Chatbot Bard，點知？Bard竟然答錯問題！條問題係：「我可以將『韋伯望遠鏡』邊啲新發現講畀個9歲小朋友聽？」NASA喺2021年12月開始用呢個望遠鏡，科學家利用佢於太陽系外發現幾粒新行星。不過就話，呢個望遠鏡拍攝到太陽系外行星第一批照片。This is wrong，因為第一批系外行星的照片，係由歐洲南方天文台的甚大望遠鏡（VLT）於2004年拍攝 。
Google係未ready？
一個錯嘅答案，令Google母企Alphabet股價當日急跌8％，市值日蒸發1000億美金，仲多過微軟對ChatGPT嘅投資金額。Obviously，蹽AI方面，Google係未ready！回吓帶，上年12月，Google AI負責人Jeff Dean就曾經對全公司講過，唔可以太急推出AI，因為一旦出錯會令公司有「reputational risk」，事實證明，佢講中咗，聲譽已損。明明未ready，點解咁急住要應戰？咁或者反映Google真係驚！
目前Google基本上係搜尋引擎市場霸主，市佔達93％；至於Bing只係得3％。微軟就喺月初電話會議上講明，公司由Google手上每拎多1％市佔，就可以帶來額外20億美金收入。目前Bing得嗰3％市佔，所以佢嘅增長空間是好很大，對微軟來講，值博率係高。
微軟突襲成功
與此同時，微軟搜尋引擎業務收入，只佔6%；但Google呢，係講緊貢獻總收入超過五成，所以壟斷地位不容有失，一旦Google市佔跌，等同直接衝擊核心業務。今次Google急就章出手，亦都係可以理解。據報道，Google近日要求所有員工每日抽出 2至4 小時，去幫公司改善 Bard。至於微軟今次用百幾億美金，就令Google驚到出醜，變相抬高Bing身價，今次突襲都算係好成功。
元宇宙已經落地獄
題外話，押注ChatGPT成為game changer嘅希望，已令微軟將「元宇宙」概念直接打落地獄，公司最近炒晒成個工業元宇宙部門，total 100人，而呢個部門只係成立4個月。與此同時，正當大家都致力搞AI時，擁抱元宇宙嘅Facebook朱克伯格，一方面話AI係今年發展目標，另一方面，最新著手搞Facebook藍剔要收錢，it's funny, hah？
