【千頌C專欄】香港富商重注北海道二世古！李澤楷、新世界都有份

一到雪季，盈大就經營「Hanazono EDGE」（餐廳及娛樂設施）、滑雪吊車、滑雪裝備租賃、滑雪學校、雪地車；一到夏天，就主力經營漂流、高爾夫球俱樂部。個高球場18洞72桿，望住有蝦夷富士之稱嘅羊蹄山打golf，係正嘅，明吸豪客。2018年，盈大公佈斥11億港元，起埋二世古花園柏悅酒店，2020年1月開幕，係日本第3間Park Hyatt酒店。當地朋友話，Hanazono設施都比較新，配套都比較好，證明盈大係有心搞好個場。

講得「港資重注二世古」，又點止李澤楷一個，新世界（017）第一個日本度假村項目，正正位於Niseko Village，旗下度假酒店「新世界·羽·度假村」將於2024年開幕。

至於位於Hirafu，2022年底開幕嘅酒店山翠NISEKO，只係得53間房，隔離就係滑雪場，可以由酒店直接滑雪出入雪場，坐擁無敵羊蹄山絕景，屬頂級精品酒店。至於開發商Hirafu Capital，網上資料一路只係搵到係香港財團，但落地問當地人，佢哋會話：「金主係順豐老闆王衛。」資料有限，fact check有困難，如果各位有多啲資料可以話我聽。

Annupuri方面，香港興業（480）早已喺雪場附近有土儲，準備興建大型度假村，總地盤面積約為60,700平方米。項目距離著名滑雪場僅10分鐘車程。據上年日本傳媒報道，集團同同國際豪華酒店品牌傾合作，但暫時未有更多新嘅update。

除咗上述發展商外，仲有一間要提提，就係原本屬於洗米華嘅LTE集團（本來叫太陽城集團）（1383）。太陽城早於2021年初公佈於二世古Hirafu雪場附近，買咗一幅22萬平方米地皮，本來係諗住起非博彩豪華度假村，有別墅、有酒店，不過隨住洗米華判監，太陽城業務要執整，據2022年半年業績，公司話考慮賣咗塊地。

二世古之所以咁吸引港資，係因為當地降雪量豐富，擁有「世界最佳粉雪」，每年都吸引世界各地人去滑雪。日本去年10月先開關，我1月去到二世古，酒店又full，周圍人又多，夜晚要食飯，如果你冇book餐廳，一係排隊食拉麵，一係逐間餐廳博佢有walk in位，有一晚我就試咗十幾間，先可以坐低食飯。

旅客目測主要歐美多，其次先到華人、東南亞人（冇咩中國人，因為當時中國未開關）。有唔少人都話，去到二世古，就好似去咗歐美咁，所以只要進入二世古範圍，基本上除咗酒店工作人員外，無論室內室外都冇人戴口罩。

後疫情時代，各地滑雪愛好者餓咗咁耐，個個都趁日本雪季時開關，衝去二世古搵返同雪地嘅初戀。不過，旅客ready唔代表二世古ready，同當地朋友傾開，突然開關，令當地酒店、餐廳、雪場請唔切人，《紐約時報》12月伍報道，出到1.6倍人工、免費住宿、免費滑雪通行證、機票補貼都未必請到。

想知到底二世古生意反彈成點，除咗睇日本旅遊局公佈數據，最方便係等盈大業績，2019年二世古雪場生意（日本四季康樂業務）收入1.11億，到2020年跌到8800萬，到2021年更低至3700萬。日本上年10月開關，相信盈大今年3月公佈至12月止中期業績，會有反映，但唔會太大，等全年業績先見真章。

最後推介二世古呢間酒吧，又好feel，啲cocktail 又好飲，叫Bar Gyu+。