【英國生活入籍考試】英國移民The Life in UK考試攻略、心得及注意事項

雖然The Life in UK呢個考試看似相當嚴肅，又係每個持BN(O)簽證並計劃申請入籍嘅香港人(除部份獲豁免人士)嘅必經之路，但其實我哋覺得考試嘅玩法似英式酒吧嘅Pub Quiz多啲。
原來英國人真係好鐘意玩呢類「常識問題比賽」，佢哋由細到大已經開始跟爸爸媽媽去地道英式酒吧玩呢類有獎問答遊戲。遊戲由主辦方出題，參加者分組搶答，優勝者可以獲取獎品。有趣嘅係呢類Pub Quiz嘅熱門題目其實與Life in the UK考試嘅範圍都幾相似，包括好多通識題，例如問英國史上最賺錢嘅係邊個電影系列？英國响1966年奪得世界杯冠軍時嘅隊長係邊個？所以如果你自問通識能力都算強，或者都鐘意去酒吧玩Pub Quiz，咁考試有一半題目你已經馬上識答。

由於「The Life in UK」考試內容分為5個唔同部份，涵蓋英國嘅歷史、地埋、社會、價值觀與原則，仲有關於英國政府、法律同埋政治，所以單靠通識能力，應該唔能夠幫你獲得75%嘅合格分數，咁即係無論如何都要俾心機溫吓書啦！

呢方面官方已經準備好充足嘅實體同線上教材，等你去課金購買：https://www.officiallifeintheuk.co.uk/shop
其實英國政府都係想要你嘅錢啫，都唔想你The Life in UK肥佬。所以循一般途徑溫書考試，對於不同程度嘅人士嚟講，基本上考試前花大約一個星期至一個月時間準備已經足以合格。

對於一啲英文唔係咁好、閱讀能力較差，或者懶得睇書嘅人嚟講，唔想買書都可以上網搵雞精班嚟讀。其中一個由香港人開嘅頻道，就好有心機咁分開咗13節，並且用廣東話講授咗The Life in UK考試嘅所有內容，呢系列節目嘅好處係，佢按照時序咁向觀眾講解英國歷史，理解上較為容易；另外對於必須背誦嘅年份、人名同資料，都用咗表列方式表示，更加方便溫習。但缺點係影片內容為全文字，觀看時比較沉悶。由於人類可以運用圖像嚟加強記憶，我哋建議當你想記熟一個必須認識嘅人名，例如大部份香港人都唔會識嘅Geoffrey Chaucer(中世紀英國詩人)時，可以首先Google咗呢個人個樣，咁會令你更加容易入腦。

如果完全唔溫書有The Life in UK冇機會合格呢？都有嘅，方法就係直接操卷！以下呢個lifeintheuktestweb網站就提供咗17張模擬試卷，總數共408條題目，附正確答案！

經過我哋嘅人肉測試，就算事前對英國歷史全無概念，完全冇讀過任何教材，只要考試前幾日重覆將17份卷連做10次，運用短暫記憶力記住所有正確答案(由於考試模式為選擇題，只需記住唯一的正確答案，其餘三個錯誤答案大可忽略)，最後一樣可以好似我哋咁輕鬆合格。

最後，為確確保大家The Life in UK考試順順利利，請特別記低以下幾個重點：

1. 即使成功報名後，仍可以因應自己嘅溫習進度於考試3日前免費修改試期，但少於3日前修改嘅話，則不能退回考試費；
2. 為了防止作弊，考試前嘅安全檢查極為嚴謹，一張紙巾都唔可以帶入試場，只可以寄存响locker。考生可以在試場內寫筆記，但離場時筆記會被即時銷毁；
3. 開考前試場主任會為考生拍照(防止代考)，同埋問考生幾個個人問題，考生不能答錯，否則須即時離開，自行重新安排考試：其中一條個人問題是問考生的國籍，持BN(O)簽證的考生必須回答「British National, Overseas」，其他答案不獲接受；
4. 另一條問題問考生參與Life in the UK考試嘅目的，考生應回答是為了申請「定居」(Settlement)；
5. 最後，考生如持有超過一本護照，必須携帶報名考試時所登記嘅護照作為身份證明文件；
6. 注意，駕駛執照並不獲接受為身份證明文件。