【英國買二手車】移民英國買二手車5大要點：一文睇清如何避開危險陷阱

正如我哋响上一篇文章所講，我哋為自己响英國買既第一部車設下咗若干項條件。首次希望車價較低，因為部車主要用作代步同操車之用；第二希望年份同咪數都唔太高，以減少維修保養成本；第三希望係歐洲車，呢個純粹出於個人偏好；最後當然係睇車地點唔可以太遠，因為當你擁有第一部車之前，就算要去好近既地方睇車都可能要搭你一兩個鐘頭車。

因為Budget所限，首先已經令我地少咗廠方認證二手車(Approved used cars)呢個選擇，否則去返官方代理買二手車，啲車一定係質素最高同最穩陣。另外因為人生路不熟，亦都希望避免搵私人放盤，因為萬一架車有咩問題，真係驚投訴無門。事實上，我哋非常唔建議大家用facebook marketplace買車。

通常你會發現marketplace上面好多筍盤，唔單止外形靚仔而且遠遠低於巿場價。正所謂便宜莫貪，原來呢啲廣告雖然架車係真，但係個放盤係假(簡單講即係偷圖)，賣家多數會响同買家溝通時先搏取對方信任，然後就會用盡各種藉口，例如話自己唔響英國，要求買家先過數落訂Hold盤，等收車後再入尾數。但係呢啲騙子收咗訂金後當然逃之夭夭，因為連人都根本唔响英國。

唔搵官方代理，唔搵私人賣家，咁英國人最經常使用既搵車方法，就係上Autotrader、AA、Cazoo等網站。呢類網站既使用方式好簡易，以我哋既Case為例，只要响Filter度逐一輸入自己既搵車要求：先寫自己住址既Post code，再揀想架車距離自己幾多英哩，然後可以輸入自己想買既牌子及型號，以及棍波/自動波、汽車/柴油/混能/電動、車型、座位數目等條件。如果冇所謂既話，以上任何一欄都可以留空，但輸入既條件愈多，出嚟既搜尋結果就會愈少同愈精準。之後，你更可以選擇搜尋結果既排列方式，例如距離優先，或者價錢優先，從而令自己更容易搵到目標車款。

以上幾個二手車網之中，個人比較習慣同偏好用Autotrader。用過呢個網，你會發覺英國買車既透明度好高，同埋响好多方面都好保障到消費者。响網站入面既每一個廣告，你都可以查看呢架車既型號既評分，以及針對呢間車行既評分，同埋過去真實買家既評語。如果係比較有規模既大車行，評分數目夠，的確可以如實反映出該車行既可靠性同服務水平。不過如果評分數人數少既話就要份外小心，因為評分都有機會做假！我哋試去兩間評分接近滿分既車行買車，去到發現對方只係比「個體戶」大小小既蚊型商戶，辦公室只係得一張枱，甚至連辦公室都冇，只係响一間小型理髮店入面做交易。至於所謂服務，更加近乎係零！

而Autotrader另一個好處，係網站會話埋俾你知每一個廣告所定明既車價，係合理、高於巿價、低於巿價，定係超抵買。當然無論貴定係平，車價很大程度上已經反映咗架車既質素同賣方既服務水平。例如同一款車，同一配備，同一年份，同一里數，如果車價上有明顯差異既話，好多時都係因為一架係來自大車行，另一架係來自蚊型車行或者私人賣家。大車行通常都會將收返嚟既二手車執到靚靚先再放盤出嚟，但自蚊型車行同私人賣家就唔會多此一舉。另外雖然兩者都會提供三個月至半年保養俾買家，但如果架車萬一有咩事，大車行通常都會親自處理，但蚊型車行就只會叫你自己聯絡保險公司，因為所有維修都係由佢賣車時送俾你果份車保去Cover。

當你响網上睇中咗部車之後，正式打電話約睇車之前，仲有一樣嘢一定要做，就係上英國政府網站(https://www.gov.uk/check-mot-history)，輸入車牌查看呢部車既MOT紀錄。原來英國所有新車落地三年後都要年年驗車，而驗車後既簡短報告都會放上網俾任何人查閱。所以即使你只係出於八卦，都可以睇晒呢部車過去邊年邊月邊日驗過車、合格定肥佬、因為咩問題而肥佬，而果啲問題係正常損耗定係屬於嚴重毛病。透過以上資料，你可以响未約睇車之前已經對呢架車既歷史有個整體概念，亦都可以估計到上手車主既錫車程度。另外，由於每年MOT都會記錄埋行車里數，你亦可以因此知道架車每年行幾多英里，所以賣家如果要刻意偽造里數紀錄都有相當大既難度。

如果你跟足以上貼士，最後約出嚟睇既車相信水準都唔會太差，或者咁講，架車同你既期望應該唔會差太遠。不過睇車試車的確係好TECHNICAL既步驟，而且呢度買車係唔興搵相熟車房上架驗，所以最後呢一步真係好睇你個人經驗同埋彩數喇。關於呢個TOPIC其實仲有好多嘢可以講，有機會再傾！