英國人點睇新移民？分享非官方嘅第一身感受！香港人有被抗拒嗎？

响英國住夠一段時間，都會感受到英國人表面上客客氣氣，內裡其實滿肚牢騷，佢哋唔容易同陌生人講自己真實嘅諗法，除非發現對方同自己嘅意見相近。呢幾年裡面，我哋都認識咗唔少英國本地人，經過長時間相處之後，慢慢感受同了解咗佢哋對於新移民嘅睇法。响呢度我哋嘗識將佢哋分為五大類。

第一類人年紀响50至80歳間，關心社會同政治，留意時事新聞，思想比較右傾。佢哋多數來自純白人家庭背景，因為見證過英國60、70年代最光輝嘅歲月，往往將今日嘅社會狀況同當年比較，有時都會將而家嘅社會問題歸咎於新移民嘅湧入。其中一個我哋認識嘅伯伯，年輕時响海軍陸戰隊服役，退休後靠養老金過活，閒時會同班本地白人朋友去酒吧飲酒、睇英超，或者去會所打枱波，對其他人講說話老實不客氣，雖然未至於直接針對新移民，但言談間都會流露出對於新移民嘅不滿。

第二類人同新一類人年紀相約，不會太關心政治，但對於本土民生議題態度積極。呢類人唔少都有宗教信仰，性格亦比較大愛同包容。佢哋嘅朋友圈中不乏其他有色人種，對我哋呢種英文唔算流利嘅新朋友態度友善，感受上亦都係發自真心。近年英國本地治安問題惡化，令佢哋都有唔少微言，但又唔會偏激地將呢啲社會問題歸咎於新移民。我哋响社區活動上認識嘅唔少上咗年紀嘅公公婆婆都係呢類人，感覺上佢哋對於香港移民都係歡迎多於抗拒。

第三類人較為年輕，年紀在20至50歲之間，响佢哋成長嘅歷程中，已經有接觸過來自不同地方嘅有色人種，而且响受教育嘅過程中，已經被深刻咁貫輸咗英國社會嘅核心價值，特別係「互相尊重」，同埋「包容唔同信仰同理念」呢兩點。我哋認識嘅其中幾個白人家庭，雖然喺英國土生土長，冇宗教信仰，但有啲係嚟自威爾士，有啲喺嚟自北愛爾蘭，早年搬嚟倫敦嘅時候，都受過本地英格蘭人嘅排擠同白眼，所以好明白外國新移民所面對嘅困難同困境，所以對外來人亦都比較包容。

第四類係由唔同地方嚟到英國落地生根嘅人，包括來自葡萄牙、意大利、波蘭、保加利亞，亦當然唔少得來自牙買加、印度、孟加拉、斯里蘭卡等地。佢哋雖然都係响英國土生土長，但父輩或祖父輩都經歷過作為新移民嘅艱辛，响自己嘅成長階段都曾經覺得自己係異類，花咗唔少努力去融入本地社會。我哋認識幾個30、40歳嘅非裔英國人，佢哋嘅英文口音比絕大部份英國白人更加準確同正宗，可以想像佢哋响讀書時期為此付出咗幾大努力。第四類人响倫敦特別容易遇到，所以倫敦好自然亦都係對新移民包容度最高嘅城巿。

本來我哋都好想講埋第五類人，但係响現實生活經驗裡面對呢類人的確認識唔多，只係口耳相傳知道佢哋嘅存在，或者就算佢哋真係出現喺你面前，都唔會直接對你表達自己嘅政見或身份。冇錯，呢類人就係所謂嘅「far-right」。

佢哋嘅年齡層相當廣闊，18到80歳都有，主要居住响英格蘭東南、東北部嘅純白人社區。我哋响英國絕無僅有嘅一兩次被本地人歧視嘅經驗，就係發生响呢啲地區。唔使講，佢哋應該係最不滿目前移民政策嘅一群人。

雖然我哋並唔知道以上五類英國人之中，邊類嘅數目最多，或者邊類作為選民嘅政治影響力最大，但係响我哋日常接觸到嘅本地人之中，思想偏激一類的確較少，感覺上大部份都係比較理性化、對事不對人。英國人成日將自己嘅核心價值掛响口邊，包括重視「民主」、「法治」、「個人自由」同「互相尊重」，普遍對於極端嘅思想相當抗拒，所以無論响國會入面抑或民間，好多人都係比較願意講道理同接受唔同意見。

包括香港人在內嘅新移民未來到底會為英國社會帶來正面抑或負面嘅影響，似乎都要靠我哋自己再俾多幾分牙力，令本地人可以聽到我哋嘅聲音。