移民英國食唔慣本地食物？邊樣英式食物於你眼中成為「劣食」？

睇得多電影都知道，英國人真係好鍾意食多士：《鄧寇克大行動》入面，英軍打打下仗返上船係食多士；《摘星奇緣》入面，曉格蘭特返到屋企第一時間又係食多士。

只不過嚟到英國之後，先知道原來多士仲有好多種食法：好多人鐘意將一種叫「Dripping」嘅脂肪類物體當成牛油咁搽响面，甚至有人鐘意响上面加上茄汁豆，加意粉，加魚手指！？

僅次於多士，餡餅應該係英國人第二鍾意嘅美食。同樣地，佢哋亦都諗到各樣天馬行空嘅新奇食法。最普通嗰種係Mince pie，即係普通嘅肉碎批；最騎離嗰種叫Stargazy pie，雖然有個咁好聽嘅名，但實情係將幾個燒熟嘅魚頭直接放响一個肉批上面……

响英國，薯條嘅最佳食法，當然係配炸魚。不過好多英國人竟然會用佢嚟配搭其他碳水化合物，例如，豆蓉(Mushy peas)、麵包(變成Chip Butty)、咖喱汁同白飯！

呢道菜式雖然有一個好刁鑽嘅名，入面當然係冇蟾蜍，只係將一啲肉(好多時係香腸)放响個批上面，加上各類醬汁同香草，然後放入焗爐焗熟佢。嚴格嚟講，都係另一種餡餅……

日本人有「親子飯」，英國人就有「Pigs in blankets」。所謂「冚咗被嘅豬」，其實只係一種完全冇創意可言嘅菜式，純粹玩文字遊戲，實際上只係用煙肉(被)嚟包住條香腸(豬)，然後煎或者焗熟佢。論製作難度，會稍為高過波蘿腸仔少少。

你估得啱，英國食物嚟嚟去去都係餡餅、香腸、薯條、薯蓉、麵包。所以今次就輪到香腸配薯蓉，通常會配搭洋葱汁同埋豌豆。雖然呢個菜式真係了無新意，但總算有齊蛋白質、碳水化合物，同纖維，而且仲係英國最受眾歡迎嘅Comfort food。

至於當麵包遇上餡餅，就會變成……Wigan Kebab！冇錯，响英格蘭西北部，真係會有人將兩塊面包，中間夾住一個餡餅嚟食。我知你哋係好鍾意餡餅，但點解要咁樣做？

又係另一種「批」，今次入面包住一條腸仔，其實同我哋細個鐘意嘅香腸包差唔多，但就好味少少。不過我哋細個只會將腸仔包當早餐，或者當零食，但英國人就會將佢當成午餐，甚至晚餐。當屋企雪櫃咩都冇剩嘅時候，冰箱入面嘅Sausage Roll就係最後嘅糧食

正宗英式酒吧一般唔會供應食物，但有時都有例外，比較常見嘅就係Scotch eggs，因為製作方法簡單：就係將一隻熟蛋，用香腸肉包住(冇錯，又係香腸)，再加上麵包糠，然後拎去油炸。味道方面當然係乏善足陳，但因為夠飽肚，都幾啱送酒。

點解日本人又係食鰻魚，英國人又係食鰻魚，而英國人竟然會諗到將鰻魚煮熟、攤凍，然後製成啫喱凍食呢？最正係，啫喱鰻魚嘅最佳食法，原來又係要配埋薯蓉同餡餅，然後再淋一殼「傑撻撻」嘅蔬菜汁响面，問你死未？

講到尾，我諗大家終於明白，點解我哋會話英國最好嘅菜式，就係Full English breakfast，而且唔介意All day咁食，因為中伏嘅機會的確係最低。